Eksámen

Don fertet ieš dieđihit eksámenii, dan dagat dáppe: https://privatist.inschool.visma.no/

Diđihanáiggit leat:
Čakčat: 01.09.21 dii. 00:05 gitta 15.09.21 dii. 23:55
Giđđat: 15.01.22 dii. 00:00 gitta 01.02.22 dii. 23:55

 

BAGADUSAT JA NJUOLGGADUSAT SIDJIIDE GEAT ÁIGOT ČAĐAHIT EKSÁMENA

Gusket sihke ohppiide ja privatisttaide.

Dát bagadusat čilgejit maid fertet váruhit eksámendilálašvuođas. 
Lea dehálaš ahte buohkat geat leat eksámenlanjas, váldet vuhtii guhtet guimmiideaset ja čuvvot gustovaš njuolggadusaid. Ulbmil dáinna bagadusain lea veahkehit ahte eksámena sáhttá čađahit oadjebas ja sihkkaris vugiin, ja ahte eksámendilálašvuohta lea nu vuogas go vejolaš.

Eksámenvávttain leat guokte váldodoaimma eksámena oktavuođas. Vuosttaš lea fuolahit ahte don čuovut njuolggadusaid, ja nubbi lea veahkehit du geavatlaš áššiiguin eksámena oktavuođas.

Bagadusaid ja njuolggadusaid rihkkun sáhttá mielddisbuktit ahte it beasa čađahit eksámena dán háve.

EKSÁMENA ČAĐAHEAPMI

BOAHTIN.
• Boađe eksámenii buori áiggis ja maŋimustá dan áigái maid eksámenovddasvástideaddjit leat almmuhan dahje mii skuvlla gohččunreivves lea almmuhuvvon. Čálalaš eksámeniidda galgá boahtit 30 minuhta ovdal go eksámen álgá.
• Jus boađát beare maŋŋit, de sáhtát šaddat vuordit boahtte dábálaš eksámenii ovdal go beasat váldit eksámena guoskevaš fágas.

LEGITIMAŠUVDNA.
• Muitte váldit mielde dohkálaš legitimašuvnna.

GO LEAT EKSÁMENLANJAS.
• Čohkket dakkaviđe dan sadjái maid leat ožžon ale ge guođe sadji almmá eksámenvávtta lobi haga.
• Dušše lobálaš veahkkeneavvut ožžot leat beavddis dahje lahkosis.
• Dárkkis ahte leat ožžon rievttes eksámenbarggu. Jus oaivvildat ahte leat ožžon boasttu bargobihtá, de galggat dakkaviđe dieđihit eksámenváktii.
• Ii leat lohpi guđege ládje ságastit earáiguin, earret eksámenovddasvástideddjiiguin.
• Bealljetelefovnnaid/bealljebilttuid oažžu dušše atnit jus eksámenbihttá dan gáibida.

EKSÁMENÁIGI
Čálalaš eksámen: Dat áigi mii lea mearriduvvon eksámenbarggus. Dasa lassin oaččut 15 min. áiggi gárvvistit ja čorget vástádusaid jus eará ii leat mearriduvvon.

Fágaidrasttildeaddji geavatlaš eksámen: Eanemusat 5 diimmu

Njálmmálaš eksámen: Eanemusat 30 min

Njálmmálaš/geavatlaš eksámen: Eanemusat 45 min.

PC-GEAVAHEAPMI, BÁHPIRAT JA ČÁLUS.
• Eanas eksámenat čađahuvvojit pc:in.
• Guovddášaddon eksámenat maid čađaha pc:in galget sáddejuvvot digitálalaččat.
• Jus eksámenbarggu čálát gieđain, de galggat buot báhpiriid maid eksámenis geavahat merket skuvlanamain ja addit daid eksámenváktii. Geavat alit dahje čáhppes peanna. Figuvrrat tevdnejuvvojit liánttain.
• Báhpiriid maid lea ožžon ii galgga gaikkodit.
• Visot báhpiriid galgá addit sisa ovdal go guođát eksámenlanja.

EKSÁMENBARGGU MERKEN
Eksámenjođiheaddji bagada movt eksámenbarggu badjeteavstta galgá deavdit.

ALE ČÁLE NAMA EKSÁMENVÁSTÁDUSSII. EKSÁMENBARGU II GALGGA MERKEJUVVOT NU AHTE SENSOR FUOMÁŠA GII DAN LEA VÁSTIDAN.

EKSÁMENVÁSTÁDUSA SISAADDIN.
• Digitála eksámen: Geahča sierra bagadusa
• Bábervástádus: Atte dieđu eksámenváktii go leat gearggus addit eksámenvástádusa. Dalle son viežžá du eksámenvástádusa. Galggat addit buot árkkaid maid leat geavahan. Vástádusárkkat galget addojuvvot sierra ja nummererejuvvot. Ráhkkananárkkat ja veahkkeárkkat mat leat geavahuvvon galget maid addojuvvot. Jus attát vástádusa ovdal go eksámenáigemearri lea dievvan, de galggat maid addit eksámenbargobihtá sisa.
• Ale guođe iežat saji ovdal go lobi leat ožžon.

Jus don buozalmasvuođa dahje eará dohkálaš sivaid geažil it geargga čállit eksámenvástádusa vástádusárkkaide, de sáhtát álgočállosa bidjat mielddusin vástádussii. Sensorat de mearridit vuhtiiváldet go álgočállosa ja mo dan árvvoštallat.

VEAHKKENEAVVUT EKSÁMENIS.
Sáhttá leat lohpi geavahit iešguđetlágan veahkkeneavvuid iešguđetge fágain. Skuvla galgá ovdalgihtii almmuhit makkár veahkkeneavvuid sáhttá váldit mielde eksámenii. Lea du iežat ovddasvástádus váldit mielde lobálaš veahkkeneavvuid. Eksámenvávttat sáhttet dárkkistit du veahkkeneavvuid.

NJUOLGGADUSAID RIHKKUN, VERROŠEAPMI DAHJE VERROŠANÁIGUMUŠ.
· Eksámenbearráigeahču mearridan njuolggadusaid dahje mearrádusaid rihkkun sáhttá, jus dat lea duođalaš, mielddisbuktit ahte ii beasa čađahit eksámena mearriduvvon fágas, vrd. Oahpahuslága láhkaásahusa § 3- 36.
· Oahppit geat leat verrošan dahje geahččalan verrošit, eai beasa čađahit eksámena eaige oaččo oppalašárvosáni, Oahpahuslága láhkaásahusa § 3-37 mielde. Ođđa eksámena ii beasa čađahit ovdal jagi maŋŋil. Ođđa eksámena ferte čađahit privatistan.

VÁIDINVUOIGATVUOHTA:
Jus leat lihccojuvvon eksámenis, de sáhtát mearrádusa váidit eksámenovddasvástideaddji bokte Fylkkamánni oahpahusossodahkii. Váidalanáigemearri lea 3 vahku.

JÁVKAN BUOZALMASVUOĐA GEAŽIL.
• Jus buohccát itge beasa čađahit eksámena, de fertet dakkaviđe dieđihit skuvlii.
• Doavtterduođaštus galgá nu jođánit go vejolaš lágiduvvot eksámenkantuvrii.
• Jus buohccát eksámenis, de fertet dakkaviđe dieđihit eksámenváktii, gii de dieđiha skuvlla eksámenovddasvástideaddjái.

• Eksámenovddasvástideaddji mearrida lea go vuođđu botket eksámena ja lea go vuoigatvuohta čađahit ođđa geahččaleami.

EKSÁMENBOHTOSAT – MAŊIDUVVON, OĐĐA JA SIERRA GEAHČČALEAPMI.

EKSÁMENBOHTOSAT:
• Privatisttat sáhttet geahččat iežaset eksámenbohtosiid privatistweb “Min side” neahttabáikkis. Go eksámenbohtosat leat gárvásat, de čállá eksámenkantuvra eksámenprotokolla ja sádde dutnje. Jus dárbbašat skuvladuođaštusa ja gealboduođaštusa, de váldde oktavuođa dainna skuvllain gos ovdal leat ožžon duođaštusa. Jus ovdal it leat ožžon dakkár duođaštusa, de váldde oktavuođa eksámenskuvllain. Oahppit sáhttet geahččat iežaset eksámenbohtosiid SkoleArena neahttabáikkis.
• Skuvla almmuha goas eksámenbohtosat áramusat almmuhuvvojit.

MAŊIDUVVON EKSÁMEN.
· Jus dus lea doavtterduođaštuvvon jávkansivva dábálaš eksámenii, de lea dus vuoigatvuohta dieđihit maŋiduvvon eksámenii, gč. Oahpahuslága láhkaásahusa § 3- 35. Muitte ahte dus lea alddát ovddasvástádus dieđihit iežat maŋiduvvon eksámenii ovdal mearriduvvon áigemeari. Privatistaeksámendivat ii máksojuvvo ruovttoluotta.
· Jus háliidat čađahit maŋiduvvon eksámena eará skuvllas, de fertet čájehit duođaštusa ahte dus lea vuoigatvuohta maŋiduvvon eksámenii.

VUOIGATVUOHTA SIERRA EKSÁMENII.
Jus leat ožžon oppalašárvosáni 1 muhtun fágas, de lea dus vuoigatvuohta “sierra eksámenii” dan fágas jus dat ii leat vuorbádanfága dahje jus dat lea dakkár fága mas dábálaččat ii lágiduvvo eksámen, gč. Oahpahuslága láhkaásahusa § 3- 33.

VUOIGATVUOHTA OĐĐA EKSÁMENII.
• Jus leat ožžon árvosáni 1 eksámenii, de lea dus vuoigatvuohta čađahit ođđa eksámena fágas, gč. Oahpahuslága láhkaásahusa § 3- 34.
Skuvllas leat eanet dieđut dán birra.
• Jus leat privatista ja oaččut árvosáni 1, de beasat dieđihit iežat boahtte privatistaeksámenii ja ođđasit máksit divvaga.

ERENOAMÁŽIT HEIVEHUVVON EKSÁMEN:
• Oahppit/privatisttat sáhttet ohcama vuođul oažžut heivehuvvon eksámena, gč. Oahpahuslága láhkaásahusa § 3- 32. Eaktun lea ahte sáhtát duođaštit dárbbuidat, ovdamearkka dihte doavtterduođaštusa dahje áššedovdi cealkámuša bokte mas čilgehuvvo movt eksámen berre heivehuvvot. Heivehuvvon eksámendárbbuid duođašteapmi sáhttá leat doavtterduođaštus omd. jus lea allergiija, čielgevihki jna., dahje cealkámuš pedagogalaš psykologalaš bálvalusas (PPB) jus omd. leat lohkan- ja čállinváttut. Duođaštus galgá leat ođas.
• Privatisttat galget sáddet ohcamuša beassat čađahit erenoamážit heivehuvvon eksámena maŋimusat 1 mánu ovdal eksámena.

VÁIDINVUOIGATVUOHTA
Dus lea vuoigatvuohta váidit árvosáni ja sáhtát eanet lohkat dan birra “Oahpahuslága láhkaásahusas” kapihtal 5. Geahča maid FFG neahttasiidduid eksámena ja árvvoštallama birra (áigeguovdilis dokumeanttat).

EKSÁMENBOHTOSA VÁIDIN – MUHTIN VÁLDOČUOGGÁT.
• Váidináigemearri lea 10 beaivvi, ja galgá rehkenastojuvvot dan beaivvi rájes goas ožžot dieđu mearrádusas dahje goas don livččet berren váldit čielgasa mearrádusas, gč. Oahpahuslága láhkaásahusa § 5-5.
• Váidda galgá leat čálalaš ja addojuvvot dan skuvlii gos čađahit eksámena.
• Fuomáš ahte váiddameannudeapmi ii leat seammá go friddja árvvoštallan. Váiddalávdegoddi galgá árvvoštallat lea go árvosátni maid leat ožžon eahpegovttolaš. Ii leat doarvái dušše čuoččuhit ahte bargu lea menddo garrasit árvvoštallojuvvon, jus háliida oažžut buoret árvosáni. Árvosátni sáhttá maiddái njeidojuvvot, jus váiddalávdegoddi gávnnaha ahte álgoárvosátni ii leat govttolaš eksámenbarggu ektui.
• Dus lea vuoigatvuohta beassat lohkat iežat čálalaš eksámenvástádusa maŋŋil go árvosátni lea mearriduvvon. Sáhtát bivdit skuvllas kopiija iežat eksámenvástádusas.
• Don sáhtát váidit čálalaš eksámena árvosáni. Njálmmálaš eksámena oktavuođas sáhtát váidit jus leat dahkkojuvvon formála boasttuvuođat, mat leat váikkuhan eksámenbohtosii.
• Fuomáš ahte mearriduvvon árvosátni váiddameannudeami oktavuođas lea loahpalaš.
• Jus árvosátni rievdaduvvo váidima meannudeami oktavuođas, de galget boares duođaštusat doaimmahuvvot ruovttoluotta ovdal go čállojuvvo ođđa loahppaduođaštus.