Norsk Samisk Print this page

Skuvlla birra

Min skuvla lea stáda joatkkaskuvla njuolga departemeantta vuolde. Dan geažil lea sámi joatkkaskuvllain iežas stivra.


Skuvla lea earenoamáš báikkálaččat, guovllolaččat, riikkadássásaččat ja gaskariikkalaččat. Skuvla álggahuvvui earenoamáš fálaldahkan sámiide. Vuođđun ledje sámi árbevirolaš ealáhusat ja sámi kultuvra. Skuvllas leat máŋggalágan oahpahusfálaldagat vai sámi nuorat galget oažžut gelbbolašvuođa válljet barggu dahje viidásit oahpahusa sámi, dáčča dahje gaskariikkalaš servodagas.

Sámi giella ja kultuvra lea mávssolaš skuvlla oahpahusas ja lagasbirrasis. Dien geažil leat ge skuvllas earenoamáš fágafálaldagat lassin dakkáriidda mat gávdnojit eará skuvllain. Guokte fálaldaga, boazodoallu ja duodji, leat riikkalinnját. Sámi temát leat maiddái mávssolaččat eará fágafálaldagain. Buot oahppit ožžot oahpahusa sámi gielas ja kultuvrras. Oahpahus sámegielas lea sihke vuosttašgiellan ja maiddái nubbingiellan. Máhttolokten - Sámegiella lea vuođđun oahpahussii.

Skuvllas leat buorit lanjat ja rusttegat. Buot ohppiin leat mátkedihtorat, lassin leat skuvllas maiddái guokte dihtorlanja. Buorre jietna- ja govvastudio dahká vejolažžan doalahit njuolggo oktavuođaid eará skuvllaiguin ja olbmuiguin, sihke gáiddusoahpahusa ja videokonferanssa bokte.

Skuvllas leat sullii 150 oahpposaji ja oahppit bohtet sihke lagasbirrasis ja guhkkelis. Lea dábálaš ahte leat oahppit eará Finnmárkku suohkaniin ja maiddái eará fylkkain. Maiddái suoma- ja ruoŧabeal nuorat ohcet skuvlii.